Chloschter Wettige

S Chloschter Wettige isch es ehemaligs Zischterzienser-Chloschter. Scho im Johr 1220 het de Heinrich vo Rapperswil z Wettige Güeter un s Patronatsrächt vo de Dorfchile chauft. Wil de Heinrich – so jedefalls d Lengende – bi ere Rettig us Seenot verschproche het, es Chloschter z gründe, het er sini Wettiger Bsitztümer em Chloschter Salem gschenkt, vo wo dann au di erschte Mönch uf Wettige cho sind. Es het de Name Maris Stella übercho, ”Maria Meerstern”. Di noii Chile isch erscht 1256 gweiht worde. Schnell isch s Chloschter zu Grundbsitz cho, bsunders im Limmattal, aber au usserhalb vom hütige Aargau. Mit de Eroberig vo de Grafschaft Bade durch d Eidgenosse im 1415i isch s Chloschter mit de ganzi Gägend zum Untertanegebiet worde un die acht alti Ort hei d Schirmherrschaft übernoh.

Im Johr 1507 het en Brand s Chloschter verwüeschtet und 1517 het me d Chile wider neu chönne weihe. D Reformation het dann für kurzi Ziit zu heftige Useandersetzige gführt. 1528 sin die meischte Mönch und s Dorf Wettige reformiert worde, nach de Niderlag vo de Reformiert be de Schlacht vo Kappel 1531 hei die katholische Ort d Rekatholisierig düregsetzt. Ab em 1595i hets verschidnigi grösseri Umbaute gäh und zwüsche 1601 und 1604 het d Chloschterchile es nois Chorgschtühl übercho.

Mit de Helvetische Republik isch s Endi vo de alte Verhältnis cho und s Chloschter het unter anderm sini Rächt im Nidergricht verlore. Au d Säkulairsiirig vom Muetterchloschter Salem im 1803 isch iischnidend gsi. D Säkularisiirig het numm e paar Johrzehnt schpäter au s Chloschter Wettige erreicht: Im Aargauer Chloschterschtrit isch s Chloschter 1841 uf Bschluss vom Grosse Rot ufghob worde. D Mönch hei s Chloschter müesse verlah un hei z Breagaz e noii Heimat gfunde. D Gebäud vom Chloschter Wettige het me ab em 1846i für s Kantonali Lehrerseminar bruucht, ab em 1976i für d Kantonsschuel Wettige.

Quelle und zum Witerläse: http://als.wikipedia.org/wiki/Kloster_Wettingen

Advertisements