Z Bade stoht d Noigstaltig vom Schuelhuusplatz aa. D Werkleitige sind in de letzschte Mönet scho in eme Ring um de Platz glägt wurde, damit sie bi de Bauarbeite, wo de Vercher entflächte wot, nöd im Wäg sind. Für de Sommer 2015 isch de Beginn vo de Bauarbeit plande, wie d Aargauer Zitig gmeldet het. Im 2017 soll de Umbau abgschlosse werde. Bis do anne wird de Vercher sehr beiiträchtiget si, grad au für ois Wettiger.
Zämme mit em Kanton het d Stadt Bade es Konzept usgschaffet, wo de Vercher wot in de Griff übercho. Vo Wettige her soll es möglich si, mit em Auto über d Hochbrugg z fahre, aber weder s links abbiege noch s gradus fahre wird möglich si. Numme rächts uf d Bruggerstroos wird Durchfahrt möglich si. In di umgekehrti Richitg cha d Hochbrugg gar nöd befahre werde. De motorisierti Vercher muess über de Autobahnzubringer und d Hochbrugg zwüsche Noiehof und Wettige oder uf d Brugg im Obersiggethal und d Strecki über Ennetbade uswiiche. Mit em Velo und z Fuess cha d Hochbrugg aber über di ganz Ziit vom Umbau bruucht werde und au d Büs sötte ohni grossi Verspötige de Fahrplan chönne iihalte. Ab em Baubeginn isch allne Wettiger z rote, uf Bade de Bus oder s Velo z bruuche.
Wettiger Nochrichte 