Mir zügled vo .net uf .ch

S noii Johr bringd für d Wettiger Nochrichte di ei oder ander Noierig. Sowohl in de Redaktion, wi au bi de Website gits en Änderig.
Am 2. April 2012 isch in oiserm Nochrichte-Blog de erscht Post veröffentlicht worde. Nach zruckhaltende 3 Johr isch dann d Zahl vo de Artikel und vo de Läserinne und Läser ab em 2015 kontinuiirlich gstige. Aber eis isch gliich blibe: De Blog isch uf WordPress veröffentlicht worde, eme Gratis-Blog im Internet, zerscht mit de Adresse wettigernews.wordpress.com, wo au hüt no funktioniirt und dann unter wettiger-nochrichte.net. Im noie Johr wird das anderscht si. Wil mir, bsunders wege de Föteli, di 3 GB, wo ois uf WordPress zur Verfüegig stönd, ufbruchd hend, wechsle mir uf Ändi Johr uf wettiger-nochrichte.ch.
Di noie Date lieged dann nümm ufeme amerikanische Server, sondern i de Schwiiz bi green.ch und sowohl d Site wi au d Adresse isch dann würkli oisi. S Layout vo de Siite isch e chli anderscht und si isch frei vo Werbig.

Di zweit Noierig hend mir scho früehner mitteild. Wil de Markus Haas ab em 1. Januar 2018 Gmeindrat isch, scheidet er us de Redaktion vo de Wettiger Nochrichte us. De Fabi und de Lutz bliibed derbi, sind aber witerhin uf oiri Unterstützig aagwise. Ihr chönnd ois witerhin unter wettiger.nochrichte(at)gmail.com oiri Artikel schicke. E 100%igi Garantii, dass si erschiined, chönnd mir oich nöd geh, aber mit Foti isch d Chance höcher wi ohni und im Dialekt höcher wi in Schriftdütsch. Mit Foti und in Dialekt isch d Chance sehr nöch bi 100%. Wer regelmässig wot schriibe oder anderi gueti Gründ cha nenne, wiso er oder si en Zuegang set ha, cha sich au bi ois melde. Technisch isch es keis Probläm, Partei, Verei oder andere Organisatione de Zuegang z ermögliche. D Verantwortig für de Inhalt ligd dann aber bi dem, wo d Nochricht gschribe het.

Advertisements