Dass mir ois als chlini Redaktion, wo lokali Ereignis ufgriifd, zu de Aaschläg z Paris düent üsere, isch für oiseri Läserinne und Läser vilicht en Überraschig. Aber, dass jede, wo wott, cha frei schriibe und veröffentliche, das isch e wichtigi Errungeschaft, vo dere au mir profitiire. Der Aaschlag uf d Redaktion vo Charlie Hebdo isch somit an Aaschalg uf ois alli und uf oiseri Freiheit.
Mir wie oisere Bestürzig Usdruck verleihe, dass Mönsche ander düent ermorde, numme will ihne das, wo anderi denke, zeichne und schriibe, nöd passd. Abgseh vo durch de Antirassismusartikel gschützte, verallgemeinerndi und pauschal verurteilendi Ussage, gits us oisere Sicht kei Grenze. Wenn eim öppis nöd gfallt oder me sich beleidiget füehlt, eifach nöd anneluege oder mit bessere Argument en Standpunkt widerlege.
Di alemannisch, also au schwiizerdütschi Wikipedia het übrigens en Artikel zu Charlie Hebdo und füf vo de Charikaturiste, wo er mordet worde sin, veröffentlicht: Em Charb, em Cabu, em Tignous, em Wolinski und em Bernard Maris. Alli wo gärn Dialekt düent läse (und mir gönnd davo us, dass das bi oiserne Läserinne und Läser de Fall isch), sind di Artikel empfohle.
Wettiger Nochrichte 