D National- und Ständerotswahle sind zwar erscht im Herbst, aber d Partei fanged langsam aber sicher aa, ihri Kandidatinne und Kandidate “in Stellig” z bringe. So het d SP Aargau am Wocheend ihri Kandidateliste zämmegstellt. D Yvonne Feri, Wettiger Gmeind- und Nationalrötin, wo vor vier Johr uf em 4. Listeplatz gstanden isch, stoht bi de Wahle am 18. Oktober uf Platz 2.
Bi de EVP wird zwar erst am 20. Januar nominiert, aber es isch hüt scho klar, dass Wettige mit de Lilian Studer e Ständerotskandidatin wird ha.
D CVP wird am 19. Februar d Nationalrotsliste bschlüsse, aber es wär es wunder, wenn kei Wettiger uf dere Liste verträte wäre, vilicht sind es sogar – wi bi de Wahle 2011 – mehreri. Anderst gsehts bi de SVP us, wo am 21. Jänner ihri Kandidate nominiere wird. Bisher hei mir kei Informatione, dass en Wettiger uf de Liste chönnt si. Au wie es bi de BDP usgseht, hei mir nöd chönne in Erfahrig bringe, aber oiseri Redaktion haltet es Aaträte vom Michael Merkli für möglich. Au bi de Grünliberale wär d Gross- und Iiwohnerrötin Ruth Jo. Scheier e möglichi Kandidatin, wohingäge mir bi de Grüene kei Wettiger Kandidature erwarte.
Wenn öppe witergehendi, ergänzendi oder korrigierendi Mitteilige für ois het, freuet mir ois.
Wettiger Nochrichte 