D Iiwohnerrot het im letzte Johr e Motion vo de CVP-Fraktion überwise, wo bi de höchere Iikomme für d familieergänzendi Chinderbetreuig e Vollkosterächnig wot iiführe. Für’s Z’Mittag würdi das bedüte, dass für d Eltere en Betrag vo bis zu 31.35 Franke fällig wär. Für Lüt mit eme höchere Iikomme, zumal wenn sie meh wie eis Chind hei, isch de Mittagstisch dann aber nümm attraktiv, isch de Gmeindrot überzügt. Er schlaht us dem Grund numme en Erhöchig uf 18.00 Franke vor. D Argument vom Gmeindrot zeiged, dass er vom Mittagstisch meh erwarted, wi eifach en Beufsichtigung und es Ässe für d Chind. Biiträg unter 20.00 Franke würde e gueti soziali Durchmischig vo de Chind mit sich bringe, wo bi höchere Biiträg nümm gwährleisted sig. S Badener Tagblatt zitiirt d Sozialvorsteherin Yvonne Feri mit de Wort: «Wenn Kinder der besser verdienenden Eltern nicht mehr zum Mittagstisch kommen, ist das auch ein Verlust für deren sozialen Lerneffekt». D Diskussion uf de Website vom Badener Tagblatt zeiged, dass d Meinige in de Bevölkerig usenand gönnd. Au de Priis vom Chindermenue wird hinterfröged: 31.00 Franke sig «masslos überteuert». We me gsehd, was es Z’Mittag in ere Beiz oder en Kebab bim Schnellimbiss choschd, dann isch das nöd vo de Hand zwiise.
Wettiger Nochrichte 