Danke im Lutz Fischer-Lamprecht für d Erlaubnis, die Foti z bruuche.
Drohnefoti vom Stadion Alteburg

In de Alteburg het de FC Wettige sini gröste Erfolg gfiired, aber in öppe 15 Johr chönnti das Denkmal vo de glorriiche Zeit vom FC es End ha. Wi s Badener Tagblatt hüt meldet, isch en Abriss bis 2030 aadengd. Ein Grund isch, dass d Juniore vom FC im Kreuzzelg ihren Tschutiplatz hei und d Gmeind en Stadionbau im Tägi möglicherwiis wot realisiere. Zudem liegd d Alteburg in eme attrakive Wohnquartier, mit Chindergärte und ere Primarschuel in de Nöchi. Au de Spitzbub isch grad Vis-à-Vis vom Stadion.

Wie guet es um de Baugrung gstelld isch, das isch ois ned bekannd. Grücht z Folg isch im Beriich vo de Tennisplätz vom TC Wettige und em Stadion Alteburg früehner Sondermüll entsorgt worde. Falls sich öppe vo oiserne Läserinne und Läser da dra duet erinnere oder vo sine Eltere oder Grosseltere mol öppis in die Richtig vernoh het, sind mir dankbar für Rückmäldige.