Ob mir Wettiger das welle oder nöd: Wettige blibd nach de Definition Bundesamt für Statistik (BfS) e Stadt.
Immer wider wird, au bi euserne Facebookbiiträg diskutierd, ob Wettige e Stadt, es Dorf oder irgend öppis dezwische isch. Sit de Volksabstimmig im Mai 2009 isch zumindeschd klar, dass d Merhheit vo de Wettiger Bevölkerig nöd de Iidruck hed, in ere Stadt z läbe. Gand anderst gseht das scho sit Johrzehnte s BfS, wo bisher Gmeinde mit meh wi 10’000 Ywohner als Städt registriird. S BfS hed uf Endi 2014 neu definiird, was e Stadt isch und was Agglomeration. Die neui Methode bstohd us ere Kombination vo de Bevölkerigsdichte, de Bschäftigde und de Logiernächt. Zudem het d Usrichtig vo de Lüt en Iifluss druf, ob und zu wellere Agglomeration d Gmeind zähld wird.
Wettige hed scho bisher zu de Agglomeration Bade-Brugg ghörd und wird au witerhin zu dere dere dezue zähld. Aber vo de bisherige 22 Gmeinde, wo zu de Agglo Bade-Brugg zähld worde sind, ghöred neu Mellige, Birr, Freiewil, Würelinge, Lupfig, Müllige, Birmistorf, Niederrodlef und Birred nümm dezue. S BfS said, dass d Verfelchtig vo dene Gmeinde au mit de Agglomeration Züri so starch sig, dass en eidütigi Zuordnig nümm möglich sig. Dafür isch Neuehof, wo s BfS bisher zu de Agglo Züri zähld hed, neu zu Bade-Brugg. Au Remige wird neu zu dere Agglo zähld, so dass sie mit Bade, Brugg, Neuehof, Remige, Ännetbade, Fislisbach, Gäbistorf, Oberrodlef, Obersiggethal, Rinike, Turgi, Untersiggethal, Wettige, Huuse und Windisch nu 15 Gmeinde umfassd.
Us oisere Sicht isch d Frog, ob nöd die ganz Agglomeration irgendwie zu de Agglo Züri ghörd, au wenn mir das gar nöd welle.
Deshalb euseri Frog an d Läserinne und Läser: Wo schaffed ihr: Z Wettige, z Bade/Brugg oder z Züri und Umgebig? Antworte gern hier im Blog, uf FB, Twitter oder Google+.
Wettiger Nochrichte 