Angst vor de Sunnefinsternis

Di partielli Sunnefinsternis vo gester het viel Ufmerksamkeit uf sich zoge. D Brülle, mit dene me gefahrlos das Spektakel hed chönne verfolge, sind usverchauft gsi.  D Gfahr, dass es zlangs Luege in d Sunne d Auge duet schädige, isch nöd unerheblich. Bi de Schuele het das schints zu – us oisere Sicht unverständliche -Massnahme gführt. Zumindest vom Alteburg hei mir vo Eltere vernoh, dass d Chind in de 10-Uhr-Pause hei müesse im Schuelhuus bliibe. Au wenn’s gester dann Informatione zu de Sunnefinsternis geh hed und teilwiis in de Klasse d Chind hei chönne durch d Brülle vo de Kollege luege, hei d Chind am Tag vorher nöd recht gwüsst, warum sie nöd werde dusse dörfe si.

Warum hed me d Chind nöd im Vorfäld ufklärd, ja sogar neugierig uf d Sunnefinsternis gmachd? Und über d Gfahr, vom direkte Luege in d Sunne? Cha me eusere Chind hüt nüm zutraue, sich an e Warnig z halte? Es muess doch möglich sie die Chind zsäge, dass es gfährlich isch, z lang ungschützt z luege und die Chind sich dra halte. Oder isch es d Angst vor allfällige Chlage vo Eltere gsi, wenn es Chind, wo nöd wod losse, d Auge gschädiged hed, wo zu dem Entscheid gführd hei? Mir finde jedefalls, dass das kei gueti Entwicklig isch!

Advertisements