1. Auguscht Fyr bim BEZ-Schuelhuus

1AugustAnspracheGeschter hät d’ 1. Auguscht Fyr in Wettige uf em Bezirksschuelareal stattgfunde. I de letschte paar Johr hät sie uf dem Zehntehofschulplatz stattgfunde, aber ufgrund vom Abriss hät mer „location“ muesse n’ändere. Es sind öppe 500-600 Lüüt cho, die meischte sind es chli älter gsi, aber es hät au Familie mit Chlichind gha, wil au es a Gratis-Isebahn für d’Chind ghä hät. S’Risotto isch vo de Wettiger Chuchimanne zuebereitet worde. Es isch super guet gsi. D’Eröffnig hät de Gmeindschriber Urs Blickensdorfer gmacht. D’Festlichcheite sind untermuuret worde vom Blasorchester Bade-Wettige. Wie i de letschte Johr hät de Grossratspräsident Festasproch ghalte. In dem Johr isch es natürli unsere Gmeindamme Dr. Markus Dieth gsi. Sini Red isch under em Motto „Einheit i de Vielfalt“ gstande. Er hät es paar Parallelene id Vergangeheit zogge bezüglich turbulenti Zyte, aber d’Schwiiz mit ihrne vielne verschiedene Kantön und Gmeinde händ sich immer wieder zämegfunde und für Stabilität in unserem Land gsorgt. Zum Aargau hät er gmeint, dass es uf Bundesebeni bekannt isch, dass de Aargau d’Wachstumsloki vo de Schwiiz isch, und dass es en ziemli dynamische Kanton isch. Zum Schluss hät de Gmeindamme no e schöni Anekdote brocht vomene Vater mit sim junge Sohn und ihrem Esel. De Sohn isch uf em Esel gsi und de Vater lauft nebedra Schtross durab, und denn chunnt a Person um de Egge und seid: „Was isch denn das für e Sach? De jungi Bängel isch uf dem Esel und de alti Vater muess nebedra laufe, nei so öppis. Denn hät de Sohn gseit, chumm Vater, gang du uf de Esel und ich lauf nebedra. Es paar Minute spöter chunnt wieder öpper und seid: Was isch denn das für e Sach? De Vater uf em Esel und de armi jungi Bueb mit sine chline Bei muess nebedra laufe. Denn hät de Vater em Sohn gseit, chumm, mer gönd beidi uf de Esel. Es paar Minute spöter chunnt wieder öpper und seit: Was isch denn das für e Sach? Beidi uf em Esel? De armi Esel muess beidi Lüüt träge, lueget doch scho sin chrümmte Rugge a. Fazit: Me cha im Läbe niemedem immer alles Recht mache. Mer söll für sich das entscheide, wo mer für richtig haltet. Aber mer söll entscheide und nöd nur passiv si und nüüt mache. Nach de beidruckende Red vom Gmeindamme sind alli ufgstande und händ d’Hymne gsunge. E glungeni 1. Auguscht Fyr.

Advertisements