In Bade sind Welle e chli hochgange, wo bekannd worde isch, dass en Nationalrotskandidat vo de CVP sich bi Vertreter vo anderen Partei beschwerd hed, wil sie Plakat für de Wahlkampf z früeh ufgstelld hei.
Wo Spaziergänger z Wettige am Sunntig am Morge ufgfalle isch, dass scho Plakat vo de CVP, de glp und de BDP stönd, da hei mir bi de Parteiverantwortliche nochgfröged. Eis vorweg: D Antwort hei eus überraschd, aber gfreud, wil z Wettige die gesetzliche Vorgabe iighalte worde sind.
De Orun Palit vo de glp hed erklärd, sini Partei heig d Plakat nachts um 3 Uhr ufghängd, d BDP am Sunntig am Morge um 8i, so de Michael Merkli. De Roli Michel, Parteipräsident vo de Wettiger CVP isch vo de Aafrog überraschd gsi und hed betond, dass sich d CVP, wie alli Parteie z Wettige, die gsetzliche Vorgabe däd iihalte. D Frog, ob “Sunntigsarbed” für d CVP nöd müesst tabu si, hed en vermuetlich gärgered, und er hed gmeind, “wer am Samschtig ufstellt isch en Böse, wills ein Tag zfrüe isch, wer am Sonntig ufstellt wird verurteilt wege Sunntigarbet und wer am Mäntig ufstellt, isch en erzkonservative Katholik…”. Mir schliesse eus gärn sim Wunsch aa, und freued eus “uf en spannende Wahlkampf und allne Kandidierende viel Glück und Erfolg!!”
Wettiger Nochrichte 