De Gmeindrot vo Wettige beatreid bim Iiwohnerrot 160’000 Franke, um d Schuelhuusplanig z optimiere. Hintergrund isch es Postulat vo de Fraktion SP/WettiGrüen us em 2013 gsi, wo de Iiwohnerrot damals überwiese hed. De Uftrag zude Schuelruumplanig isch em Gschäftsleiter Schuel übertrage worde und im September 2014 isch en Arbedsgruppe iigsetzt worde, wo sich um das Thema kümmered hed.
Es hed sich zeigd, das die bisherig Schuelruumplanig, wo sich uf d Iiwohner- und d Geburtszahl gsützd hed, nüm gnüegd. Gründ sind di höchi Mobilitätsrate, wo defür sorgd, dass vieli Familie nüm so lang an eim Ort bliibe, wie das bisher aagnoh worde isch. De Gmeindrot ziehd do drus d Konsequenz, dass es Planigsbüro die erwartede Schüelerzahl muess erruiere. Anders wie s Badener Tagblatt gmelded hed, hed de Gmeindrot scho im Februar acht Planigsbüros für en Offerte aagfröged, vo dene sich füf beteiliged hei. D Wahl für de Planigsuftrag isch d Firma SWR Infra AG und Landis AG Bauigeniuere + Planer gfalle. Wenn de Iiwohnerrot de notwendig Kredit bewilliged, dann wird de Uftrag erteild.
Quelle: http://www.wettingen.ch/de/aktuelles/aktuellesinformationen/?action=showinfo&info_id=291445
Witeri Infos in de Limmatwelle vom 27. Augste 2015
Wettiger Nochrichte 