Geocaching isch es Hobby wo vili Lüt begeisteret. Mit eim vo dene, wo mit füürifer derbi sind, hei mir vo de Wettiger Nochrichte gredt, nämlich mit em Marco Diem.
WN: «Marco, danke, dass du dir Ziit für das Gspröch gnoh hesch. Chasch du oiseren Läser churz erlütere, um was es bim Geocaching goht?»
Marco:  «Geocaching, au GPS Schnitzeljagd gnännt, isch e Art elektronischi Schatzsuechi oder Schnitzeljagd. D’Versteck werdet ahand vo de geographischer Koordinate im Internet veröffentlicht ond chönd aschlüüsend mit Hilf vomene GPS Grät oder Natel gsuecht werde.»
WN:  «Die Caches sind ja dann aber im Freie. Isch Wind un Wetter keis Probläm?»
Marco: «En Geocache isch eigentlich en Wasserdichte Behälter mit emene Logbuech.»
WN:  «Für was isch das Logbuech und isch schuscht no öppis im Bhälter dinne?»
Marco:  «Je nach grössi hend au Tuuschobjekt Platz. Als Geocacher suecht me zerscht ahand vo de Koordinate de Cache den treit mer sich dert iih mit sim Benutzername. Denn chammer das entweder per Handy oder diheime am PC sich no iischriebe. Je nach dem chammer was usfüehrlichs schriebe wie de Cache gfunde hesch etc oder eifach was churzes.»
WN:  «We me eifach per GPS Koordinate muess sueche, isch da smit de Ziit nöd e chli langwiliger?»
Marco:  «Neinei. Es git verschideni Arte vo Geocaches. Di traditionelle sind dert wo Koordinate azeiget versteckt. Aber es git au Multi-Cache, das sind Cache’s mit 2 und meh Statione. Bi Mystery-Cache muess mer sogar zerscht es Rätsel löse. Sobald das s’Rätsel glöst hesch, bechunsch us dem nachher Koordinate. Und au super sind Event-Caches. Bemene Event trifft mereri Cacher und kann zeme hocke und Rätsel bespreche oder eifach was Esse oder Trinke.»
WN:  «Und die Caches gits uf de ganze Wält? Und au z Wettige?»
Marco:  «Ja. In Wettige het’s aktuell 62 Caches devo sind 50 Tradis, 8 Mystery und 4 Multi Caches.»
WN: «Und wi entstoht so en Cache? Der gheit ja nöd eifach vom Himmel, oder?»
Marco:«Es git Internetsite womer so Cache Behälter chaufe chan oder mer chan selber eine zemebaue.»
WN:  «Da müent mir ois au emol uf d Suechi mache. Wo gits no meh Informatione und was muess me mache, wenn me au mit uf d Suechi wot goh?»
Marco: «Wer meh vom Geocaching erfahre möcht, chan ufd Homepage http://www.geocaching.com. Dete cha me sich au aamälde.»
WN: «Danke fürs Gspröch und witehrin viel Spass bim Sueche!.»


.