Es isch scho länger bekannt, dass s Alterszentrum St. Bernhard vo de Räbbärgstroos an de Langäcker wot zügle. D Aaforderige an es moderns Alterszentrum sind in de historisch gwachsene Gebäud am Lägerhand nöd z erfülle und d Erreichbarkeit isch, bsunders für alti Lüt, es grosses Problem. D Gmeind Wettige het scho vor vilne Johr im Langäcker Land für es Altersheim reserviirt und jetzt wot d St. Bernhard AG dete en Noibau errichte, wo allne hütige Aaforderige an e settigi Iirichtig erfüllt und im Kanton e Vorriterrolle wot überneh.
Bi ere Pressekonferenz am Fritig isch jetzt s Siigerprojekt vorgstellt worde, wo us acht Vorschläg bi eme Projektwettbewerb vo de Jury usgwählt worden isch. De Noibau bestoht demnach us drü Komplex, wo mitenand verbunde sind und so en Optimiirig vo allne Abläuf werde ermögliche. De mittler Teil söll füf Etage ha, di andere beide je viir. Innovativ isch bsunders d Integration vo 60 Wohnige, wo d Lüt im Alter chöi innezügle und wohne bliibe, au wenn si oder de Partner zu eme Pflegefall wird. So es Konzept isch im Kanton Aargau bisher nöd. Zudem sind 100 Pflegzimmer vorgseh, e Cafeteria bezihigswiis es Restaurant, wo au für d Allgemeinheit offe stoht.
Wettiger Nochrichte 