Drü Mönet lang isch es ums Chloschter umme eigetümlich still gsi. Wege ere Revision hei d Glocke vo de Chloschterchile nöd glütet, aber ab en Sunntig isch das historische Glüt wider im Iisatz.
S Glüt vo de Wettiger Chloschtechile bstoht us acht Glocke, vo denen sibni in de erschte Hälfti vom 17. Johrhundert gosse worde sind. Numme eini het im 1938 müesse ersetzt werde. Di Glocke sind in de letzschte drü Mönet revidiirt worde und mir hei ois mit em Verantwortliche Monteur in de Chloschterchile troffe.
Mir het d Begeischterig für sini Arbet gspürt, wo mir em Thomas Zingrich zuglost hei. Sehr detailliert het er drüber brichtet, was bi de Glockerevision alles gmacht worden isch. Bi allne acht Glocke isch de Klöppel entfernt worde und me het d Glocke us em Glockestuehl usbaut. D Holz-Joch, an dene di Glocke normalerwiis befeschtiget sind, sind abgnoh worde und z Aarau bim de Firma Rüetschi greiniget. Wils Eicheholz au nach einige Johrhundert no tröchnet und sich zämmezieht, hei d Bschläg müesse verkürzt werde und si sind reschtauriirt worde. Au d Achse sind ernoieret worde.
Ufgrund vom Projäkt ProBell, wo d Fachhochschuel Kempten im Allgäu in Zämenarbet mit europäische Glockegüssereie öppe in de Johr 2005/2006 duregführt het, isch sehr vil Fachwüsse noi entstande: Über d Haltbarkeit vo Glocke, em optimale Verhältnis vo de Klöppel- zur Glockegrössi und anderi wertvolli Erkenntnis sind zämme cho, wo jetzt au z Wettige zur Aawendig cho sind.
So sind d Glocke scho im Vorfäld mit Sensore versehe worde und me het Messige vorgnoh, damit di noie Klöppel genau di richtig Gröss und s richitge Gwicht hei, um d Glocke möglichscht schonend z lüte. In de Zwischeziit hei alli Glocke ihre noie Klöppel übercho, wo jewils dütlich lichter isch, wi de bisherig. Het en Klöppel früehner 4-6 Prozent vom Gwicht von de Glocke gha, sind es numm no 3-4 Prozent. Au d Form vo de Klöppel het sich veränderet.
In de Zwischezit hänged d Glocke wider im Glockestuehl, d Läutmechanik wird montiirt und d Glocke ganz genau usgrichtet, damit si bi de gringste Abnützig de beschtoi Klang chöi erzüge. Ab em Sunntig werde si wider regelmässig lüte und im nächschte Johr gits dann no einisch Messige, damit me gseht, ob es noch chlini Änderige bruucht, oder ob scho alles i de Ordnig isch.
Wettiger Nochrichte 