2015-12-17 19.45.57.jpg
De Iiwohnerrot bi sinere Sitzig

Bi de hütige Sitzig vom Iiwohnerrot hei zwei vo de drei Kreditabrechnige z Rede geh. Bsunders kritisch sind d Vote zu de Kreditabrechnig vom Umbau vom Erdgschoss im Rothuus gsi. D Koschteüberschritig vo 23.2 % het d Frog ufgworfe, warum de Gmeindrot kein Nachtragskredit bim Iiwohnerrot beaatreit het. De verantwortlichi Gmeindrot, de Daniel Huser, het in sim Votum Verständnis für d Kritik güsseret und Massnahme ufzeigt, wo setigi Kosteüberschrititige in Zuekunft sötte verhindere. Bi de Abstimmig het de Iiwohnerrot bi nün Enthaltige d Abrechnig gnehmiget.
Au d Überschritig vom Kredit für de Bau vom Doppelchindergarte im Langäcker isch mit über 6 % nöd grad uf Begeischterig im Rat gstosse. Gliichwohl isch d Abrechnig mit 8 Enthaltige dütlich aagnoh worde.
Di dritti Kreditabrechnig vo de hütige Sitzig het de Umbau vom EW-Gebäud a de Landstross für d Regionalpolizei betroffe. S Projekt sig weniger komplex gsi wi di andere beide, so de Daniel Notter für d Fiko. Glichwohl sigs erfroilich, dass de Kredit um 11 % unterschritte worde sig. Es sig es Muschterbispiil für e gueti Planig, so het sich es Rotsmitgliid güsseret. So isch d Abrechnig eistimmig guet gheisse worde.
Es witers Traktandum isch d Motion vo de Kirsten Ernst für öffentlichi WC-Aalage gsi. De Gmeindrot het guet chönne begründe, warum er nöd bereit isch, das Aalige als Motion entgege z näh, aber in Form vo eme Postulat keis Problem gseht. Will d Motionärin bereit isch gsi, ihrs Postulat in e Motion umzwandle, het das Traktandum kei Abstimmig brucht.
Bi de Wahle het de abtretend Iiwohnerrotspräsident vorgschlage, dass zerscht d Vote zud e einzelne Wahle sötte erfolge und danach alle Wahlzettel uf einisch iigsammlet würde.
De Fraktionspräsident vo de CVP het dann en kurze Iiblick in d e CV und d Hobbys vom Paul Koller geh und de Daniel Frautschi het de Hansjörg Huser vorgstellt. Beidi sind mit jewils 43 Stimme bi 45 usteilte Stimmzettel gwählt worde. Zudem sind als Stimmezähler de Dacfey Dzung mit 44 Stimmen und de Michael Merkli mir 38 Stimme gwählt worde.
De scheidend Präsident, de Josef Wetzel, het sich bim Rat bedankt und mit ere kurze Red verabschiidet. Er wird uf Endi Johr us em Iiwohnerrot ustrete. De Rat verlah het per sofort de Tobias Mittner (SVP) us gsundheitliche Gründ und d Helen Suter (EVP) wird im Januar ihri letzschti Sitzig ha. Si hört us bruefliche Gründ.

 

2015-12-17 21.20.59.jpg
De Paul Koller zeigt sis Könne

Bim aaschlüssende Apéro, zu dem au di zahlriiche Zuschauerinne und Zuschauer uf de Tribüne iiglade sind gsi, het de neugwählti Paul Koller sini sportlichi Fähigkeite müesse unter Bewiis stelle, muess aber wege mangelnde Trefferqualitäte es Training absolviire.

 

 

 

 

 

Advertisements