Chilegmeind muess Lt usmuschtere

Vili Wettigerinne und Wettiger kenne de chli grüen Laschtwage vo de reformiirte Chilegmeind und de ei oder di ander isch au scho damit gfahre. Sit guet 25 Johr het er gueti Dienscht gleischtet, muess jetzt aber usgmuschteret werde.

S Brocki, wi de VW Lt mengisch au gennt wird, het im 1990 sin Dienscht ufgnod, damals für d Brockestube, wo d Chilegmeind gha het. De Vorgänger isch no orange gsi und vo dem het er de Ufbau übercho. Wo d Brockstube ufgeh worde isch, da isch das Fahrzüüg aber im Dienscht vo de Chilegmeind blibe. Will de Ufbau so gäbig gsi isch, und für so es chlises Fahrzüüg dine vil Platz isch gsi, sind mit dem Fahrzüüg unzähligi Züglete unternoh worde, d Jugendmusik het en zum Transport vo grosse Inschtrument dörfe bruuche und au d Theatergsellschaft het mengs mit em Lt transportiirt. Ebeso het d Jungwacht, de Wettiger Singchreis, d Harmonie Wettige-Chloschter und vili andere das Fahrzüüg scho bruucht. Für di aastehendi Fahrzüügprüfig wäre d Reparaturchoschte z höch gsi, so dass d Chilegmeind s Fahrzüüg wird usmuschtere, so dass afangs April en Ära z End goht.