D Wettiger Futsaler hei es gschafft – si sind im Final!

Scho de Siig z Lugano het Hoffnig uf es erreiche vom Final in de Nati A vo de Swiss Futsal League gmached. D AFM Futsal Maniacs isch dere Erwartig grecht worde.

2016-03-06 19.30.54Vor ere mit guet 300 Zuschauerinne und Zuschauer guet gfüllt Sporthalle im Tägi het d AFM de dütlich besser Start verwütscht wi Lugano. Scho bald hets 3:0 gstande und de Halbzitstand isch mit 5:1 für d AFM beruhigend gsi.
In de zweite Halbziit het me vo Aafang aa gmerkt, dass Lugano de Match no nöd verlore git und wo Wettige innerhalb vo ganz kurzer Ziit drü gueti Chance vergeh het und Lugano im Gägezug vo de dritte Chance es Goal gmacht het, da hetti de Match vilicht no einisch chönne kippe. Er isch in dere Phase hart umkämpft gsi und insgsamt hets drü Penalty geh, eine für Lugano und zwei für Wettige, wobi Wettige de zweit nöd het chönne verwandle. Zwei Spieler vo Lugano sind mit ere rote Charte vom Platz gstellt worde, eine wegeme völlig überflüssige Foul, de ander wegere Notbrems. Zum Schluss sind d AFM mit 8:5 als Siiger vom Platz gange.
Jetzt stönd si am nächschte Samstig gege Futsal Minerva in de Wankdorfhalle z Bärn im Final!

Jetzt gits au no es Video zum Match:

Advertisements