Z Wettige git es scho einige Kulturdenkmäler, wo verschidni Kategorie vo Schutz gnüssed. Di Lischte wird jetzt verlängered.
Uf de dütsche Wikipedia cha me luege, welli Gebäud, Hüser, Brunne , Gränzstei und anders vo Wettige unter Schutz stoht. S Chloschter stoht unterm Schutz vo de Eidgnosseschaft, 34 Baute unterm Schutz vom Kanton und 52 witeri Objekt uf Ebeni vo de Gmeind . Jetzt het de Gmeindrot, uf Basis vo zwei Vorstöss im Iiwohnerrot, di Lischte verlängered. S Bauinventar überchunnt so en Erwiterig für Baute us de Ziit vo 1920 bis 1980, wo d Hauptsidligsentwicklig vo Wettige stattgfunde het. 81 Einzelobjekt und 14 Ensembles überchömmed noi en Schutzstatus.
Di noi z klassifiziirende Baute sind in zwei Gruppe iiteilt worde, wo en unterschidliche Schutzgrad gnüsse. D Aazahl vo Objekt mit emem höchere Schutzgrad stiiged vo 23 uf 60 Objekt. De gröschti Teil vo de Schutzobjekt ab em Johr 1920 sind im Bsitz vo de öffentliche Hand oder vo Akteur, wo in de Öffentlichkeit operiire, wi s EWZ.
De Gmeindrot het am 14. April 2016 s Dossier zu Hände vo de kantonale Vorprüefig verabschiidet und het für d Duur vo de Teiländerig vo de Nutzigsplanig e Planigszone erlasse, damit nachteiligi Veränderige a de schützenswerte Baute und Ensembles chönd vermiide werde. Es bestoht aber keis Bau- oder Änderigsverbot.
D Grundeigetümer, wo betroffe sind, werded vo de Gmeind direkt aagschribe und di interessiirt Bevölkerig wird im Rahme vo de öffentliche Mitwirkig über d Detail vo de Vorlag informiirt.
Nach de Lischte, wo hüt, Donnschtig, 28. April 2016 in de Limmatwelle veröffentlicht worde sind, handled sichs um d Parzellenummere 83, 169, 318, 322, 324, 325, 328, 329, 330, 331, 340, 348, 1107, 1205, 1212, 1215, 1234, 1241, 1243, 1245, 1277, 1357, 2075, 2139, 2341, 2617, 2670, 2745, 2806 2807, 2808, 2889, 2954, 2955, 3026, 3032, 3090, 3192, 3193, 3199, 3252, 3435, 3520, 3629, 3630, 3998, 4002, 4084, 4084.1, 4137, 4729, 4981, 5506, 6009, 6067, 6556 (ohne Gewähr).
Wettiger Nochrichte 