In de Bündner Herrschaft hend d Räbbuure in de vorletschte Nacht zwüsche de Räbe Froschtkerze la brönne, um d Räbstöck vor de Chälti z schütze. Aber au z Wettige isch es an exponiirte Lage chalt gsi, zu chalt, wi sich hüt zeiged het.

Frostschäde a Räbstöck (Foti Christian Steimer)
Froschtschade (Foti: Christian Steimer)

Libhaber  vom iiheimische Wii sind verschrocke, wo si Föteli vom Lägerehang gseh hend: Einigi Triib vo de Räbstöck sind verfrohre. Wil de März zimlich warm isch gsi, isch s Wachstum vo de junge Triib scho so starch fortgschritte. Dadurch wird de Froscht für d Räbstöck zumene Probläm, will d Leitbündel bi Froscht kristallisiire, d Zellmembrane verschtopfe und so es witers Wachstum unmöglich mache.
Mir hend de Wettiger Winzer Christian Steimer gfröged, wi er d Schäde duet iischätze. Er het gmeint er chönni no nöd gnau sege, wi vell Schade es het geh, wil er geschter Obig numme bi einere Parzelle glueged het. «Schade werds sicher geh und Ertragsiibuesse be de betroffne Parzelle», so de Christian Steimer. «Aber es esch au z sege, dass nid de gsammt Wettiger Rebberg betroffe esch. Es git es paar exponierti Lage wo de Froscht Schäde verursacht het.» So hoffed er, dass de Räbbärg im Grosse und Ganz mit eme blue Aug davo cho isch.