Noii Usstellig im Museum Eduard Spörri

Vom 28. Mai bis zum 11. Dezember 2016 gits im Museum Eduard Spörri e noii Usstellig. Unter em Motto «Eduard Spörri trifft… Nora Dreissigacker: Vieni via con me.» werde Werk vo de Nora Dreissigacker usgschtellt. Am Fritig isch d Vernissage.

Museum Eduard Spoerri Nora Dreissigacker

Nora Dreissigacker, A la recherche, 2015, Acryl auf gebranntem Ton

Sit em 2010 gits di Usstelligreihe «Eduard Spörri trifft…», wo sich in dem Johr em Thema «Relief» widmet. Di klassische Bronze-Relief vom Eduard Spörri treffed daderbi uf rohi, us Ton brönnti Relief vo de Nora Dreissigacker (geb. 1961 z Bärn). So wis Relief, wo als Hybrid zwüsche Bild und Skulptur nienet ganz dihei isch, ziht sich s Thema «Migration» durchs Werch vo de Künschtlerin, wi sit Johre z Genua läbt.
D Vernissage isch am Fritig um sibni am Abe im MUSEUM EDUARD SPÖRRI a de Bifangstrasse 17a z Wettige. D Aawesende werde durch d Präsidentin vo de Eduard Spörri Stiftig, de Frau Vizeammaa Antoinette Eckert begrüesst werde. Für d Iiführig in d Usstellig wird de Kurator vom Museum, de Rudolf Velhagen, s Wort ergriife. Bi de Vernissage wird au de Usstelligswii präsentiirt, wo en Etikette het, wo vo de Nora Dreissigacker entworfe worde isch.

 

 

Advertisements