Seniore-Uusflug mit Sunnä im Härzä


Am 24. und 25. Mai hei sich die reiseluschtige Seniorinne und Seniore vor reformierte Chilegmeind Wettige-Nöiehof uf ihre jöhrlichi Uusflug begäh: D’Reis isch in Richtig Aarau und Staffelegg loosgange. De Himmu isch zwar bedeckt gsy, und a beede Täg hett’s irgend einisch es Tröpfli Räge gäh, aber s’isch würkli chum de Red wärt gsy und d’Sunne isch im Härze vo de Reisegellschaft beschtens uufghobe gsy… Als Begleiterinne sind übrigens d‘Froue vom Seniore-Nomittags-Team und d‘Sozialdiakonin Yvonne Keller mit vo de Partie gsy.
Im Park im Grünen z‘Münchenstei isch en ¾-stündige Kafihalt mit Glägeheit zumene churze Spaziergang im Park iigleit worde. Am 24gischte isch es doch zytwilig rächt trüeb und chüehl gsy. Hingäge het es am Mittwuche im Verlouf vom Morge Ufhellige gäh und Zyt für de Spaziergang isch für die Einte scho chly knapp bemässe gsy. Hingäge hei alli d’Wiiterfahrt in Richtig Loufetal und ufe zum Passwang, wo s’Schwarzbuebeland mit em Jura-Südfuess verbindet, sehr gnosse. Und ersch de feini Zmittag im Restaurant Alpeblick, wo am Dsischtig äxtra für die Reisegruppe de Ruehetag hett lo ids Wasser gheie! Di feini Solothurner-Torte, wo de Sigrischt allne empfohle het, hätt bim beschte Wille kei Platz meh gha i dene volle Büüch…

Jo richtig – Solothurn isch s’nöchschte Ziel vo de Uusflügler gsy. Ca. am halbi Vieri het de Car vor em Baseltor aaghalte und während die Einte sich uf eigeti Fuuscht ir barocke Altstadt umeglueget hei, sind die Andere pünktlich am Vieri parat gsy zur Express-Füehrig. Für alli zäme isch d‘Zyt bis zum Ufbruch am Föifi wie im Flug verstriche. De einzigi Währmuetstropfe in Solothurn isch – us Sicht vo all dene, wo nümme eso guet z’Fuess sind – d’Chopfstei-Pfläschterig vor Altstadt gsy.

Uf der Rückfahrt het die erfahreni Strosse-Kapitänin Erika Brumann de Stou elegant „umschiffet“ mit eme Abstächer über Land, via Langetu nach Rotrischt.

Müed, aber glücklech und zfride het die ganzi Reiseschar a beende Täg gäge die halbi sibni wider s’Chilegmeindhuus Wettige erreicht und isch scho gspannt gsy, wo das d‘Reis ächt im nöchschte Johr hifüehrt. (YK)

 

Advertisements