«Was Gott durch Berge getrennt hat, soll man nicht durch Tunnel verbinden»

Bi de Bundesfiir uf em Schuelhuusplatz vo de BEZ het de Grossrotspräsident d Feschtred ghalte. Er het sich dütlich für d Erhaltig vo de Freiheit usgschproche.

De Gmeindsammaa Markus Dieth (rechts) begrüesst Grossrotspräsident Marco Hardmeier

Nach de Begrüessig durch de Gmeindsschriiber Urs Blickenstorfer het bi de Bundesfiir de Gmeindsammaa Markus Dieth s Wort ergriffe. Kurz zämmegfasst het er di vile Infrastrukturprojäkt, wo in de letschte Johr realisiirt worde sind und di offnige Projäkt wi d Drüfachturnhalle und s Tägi.

Nach eme Musikstück vo de Harmonii Wettige-Chloschter het de Grossrotspräsident Marco Hardmeier s Wort ergriffen. Wil er glichzitig Schuelleiter vom Zehnehof isch, het er de Wettigerinne und Wettiger fürs noie Schuelhuud danked, wo im Februar 2017 wird bezoge werde. Er het au druf higwise, dass hüt de 725. Geburi binde Eidgnosseschaft isch und über d Bedütig vom Gotthardbasistunnel für de Zämmehalt vo de Willensnation Schwiiz. Au s Zitat «Was Gott durch Berge getrennt hat, soll man nicht durch Tunnel verbinden», wo us em Vorarlberg stammed, het er in dem Zämmehang zitiirt, wobi ja grad d Tunnel und Brugge für de Zämmehalt i de Schwiiz wichtig sind. Als di viir Süüle vom Land het de Marco Hardmeier d Rechtstaatlichkeit, d Demokratie, d Gwaltetrännig und Freiheit gnennt. Bi de Freiheit isch ihm wichtig gsi, dass si nöd durch Kontrolle cha entstoh und me sich nöd uf Angschtmacherei söt iilah. Bsunders im Blick uf d Terrorängscht isch ihm das wichtig gsi.

Mit em Singe vom Schwiizerpsalm und eme witere Konzert vo de Harmonii Wettige-Chloschter isch de offiziell Teil vom Aalass dann z Änd gange.
Nutze mir s verbindende, aber nöd numme durch Tunnel sondern au durch Brugge. 

Advertisements