De Aatrag für d Saniirig vom Tägi über 46’5300’000 Franke chunnt vors Volk. De Iiwohnerrot het hüt am Abe s Kreditbegehre aagnoh.

D Diskussion isch intensiv gsi und het sini Ziit bruucht. Zudem sind zwei Zuesatzaaträg gstellt worde. De erschti isch vo de SVP cho und het welle, dass d Finanzkommission regelmässig über d Choschte informiirt wird, wenn s Projäkt dann umgsetzt wird. De Aatrag isch dütlich aagnoh worde. En witere Aatrag het welle, dass d Kreditsumme dütlich als Koschtedach bezeichnet wird. De Aatrag isch bsunders deshalb uf Widerstand gstosse, wil us rächtlicher Sicht de Kredit eh es Koschtedach isch. Gliichwohl hend 22 Iiwohnerröt für de Aatrag gstumme. Wil bi 4 Enthaltige 22 dagege sind gsi, hets en Stichentscheid vom Präsident Paul Koller bruuchd, wo gege d Verwendig vom Begriff Koschtedach isch gsi.

De Aatrag vom Gmeindrot, em Kreditbegehre vo 46’530’000 Franke für d Saniirig vom Tägi hend dann 38 Iiwohnerröt zugstumme, 4 hend es abglehnt und 6 hend sich enthalte. S Stimmvolk wird am 27. November drüber entscheide, obs Tägi würkli saniirt wird.