«Winzer trifft Künstler» isch s Moto vo de geschtrige Führig durch di aktuell Usstellig im Museum Eduard Spörri gsi. «Vieni via con me» vo de Nora Dreissigacker zeigt vor allem Relief.

Roli Michel, Ruedi Velhagen, Nora Dreissigacker und Markus Dieth (v.l.n.r.)
En interessiirti Schar vo öppe 25 Lüt het sich geschter im Museum Eduard Spörri iigfunde, um mit de Künschtlerin Nora Dreissigacker und em Kurator vom Museum, em Rudolf Velhagen, d Usstellig aazuluege und aaschlüssend Wettiger Wyspezialitäte mit em Kellermeister vo de Wybaugnosseschaft, em Meinrad Steimer z deguschtiire. S Augemerk isch bi de Führig uf de Aktualität vo de Werk vo de Nora Dreissigacker glege, wo sich mit em «Unterwägs si» bschäftige und mit em Zämmespiil vo Ihre Werk mit dene vom Eduard Spörri. D Relief vo de Künschtlerin, wo z Genua läbt, sind sehr usdrucksstarch und und farbig und chönnd d Betrachter so fessle, dass me mit inne zoge wird, wi de Wettiger Gmeindsammaa, de Markus Dieth in eme Gruesswort feschtghalte het. De Präsident vo de Wybaugnosseschaft, de Roli Michel het über d Usläs vomene Pinot Noir, wo mit eme Relief vo de Nora Dreissigacker etikettiirt isch, de Boge zu de andere Wy gschlage. Sechs verschidnigi sind zum Trinke parat gstande, vom Blanc de Noir über en Pinot Gris bis zu viir verschidnige Pinot Noir. Alli Truube sind am Lägerehang gwachse gsi und vom Meinrad Steimer im Keller hegt und pflegt worde.