Scho zum 15. Mol finded vom 27. bis 29. Dezember 2016 s’Internationale Juniorenturnier vom HC Rootwiis Wettige (RWW) i de Sporthalle Tägerhard statt. Nünzäh Gaschtmannschafte reised us Öschtriich, Dütschland, Italie ond de Schwiiz – de U16 Nati-Jungs – a.
Nünzäh Gäschteteams und natürlich viir Wettiger Teams kämpfed um jede Ball ond um wertvolle Pünkt. Gspelt werd i 4 Kategorie: U14/U16 wiiblich und männlich, das send d’Johrgäng 2000-2003. D Girls-Mannschafte häd mer, well RWW im Moment z’wenig eigene Meitli häd, met Girls us andere Schwiizerclubs ergänzt. Sie träted als RWW Allstarteam a.
S’Turnier söll näbed em sportliche auch zom gsellschaftliche Erfolg werde. «Da send mer of Euchi Unterstützig agewiese. Mer hoffed, Euch als Fans of der Tribüne begrüesse z’chönne», so d OK-Präsidentin Moni Huber im Blick uf oiseri Läserinne und Läser. «Selbstverständlich esch au e Festwirtschaft in Betrieb», so d Moni.
S’Turnier startet am 27. Dezember 2016 am 10.30 Uhr. De ganzi Tag ond au am 28.Dezember fendet d’Gruppespiel statt. Am 29.12. ab em morge am 8i werded d’Finalspiel apfiffe und ca. am viertel ab 2 esch d’Siegerehrig. De ganzi Spielplan findet mer au of de Homepage vo RWW. http://www.rww.ch.
Wettiger Nochrichte 