Jubiläumsshow: 75 Johr DTV Wettige

I einere Wuche isches sowiit: De Dameturnverein Wettige fiiret sis 75-jährige Jubiläum.

Di bekannti und beliebti Multi Mega Show findet am 28./29. Januar 2017 ide Turnhalle Tägerhard miteme neu zämegstellte OK als Jubiläumsshow statt. Über 350 Turnerinne und Turner sind sit Wuche flissig am Üebe zum es abwächsligsriichs und interessants Programm zämezstelle für de spezielli Alass. S Motto vode Show stoht das Johr ganz im Zeiche vo 75 Johr Turngschicht. Jedi Nummere zeigt öppis usem Gründigsjohr vode Riege wo sie vorturnet, so gohts zum Bispiel bide Grätriege um d Gründig vo Swatch-Uhre, bide Dameriege heissts “Happy Birthday” und bim Chinderturne wird de Bau vom Gotthardtunnel thematisiert. All das und no viel meh werded de DTV Wettige und zuesätzlich de Gastverein STV Wettige a dem Wuchenänd zwei mol zum Beschte geh. Fürs libliche Wohl wird das mol mit feinem Raclette und natürli mit Würscht und Schnitzelbrot vom Grill gsorget, nach de Show gits jewils no Barbetrieb im Tägi. Usserdem gits super Priise zum gwünne bide Tombola – under anderem zwei Flugtickets vo Kontiki am Samschtig und es Bike vo Bauer Sport am Sunntig – zäme mit vielne andere tolle Sache. Wer gern scho vor de Show möchti mit eus astosse chan sich und anere zweite Person übrigens es Doppelticket mit dezueghörigem Itritt für de Apéro bstelle unter info@dtv-wettingen.ch. De DTV Wettige freut sich riesig uf en glungene Alass und bedankt sich jetzt scho für all die Unterstützig wo mer vo verschiedene Siite dörfed erfahre.