Maislabyrinth mit grossem Fäscht eröffnet

Hüte isch s Maislabyrinth eröffnet worde. Vili Besucherinne und Bsuecher hend de Wäg an di Alt Otelfingerstross gfunde.

De Mais isch in de letschte Woche ordenti gwachse und isch meh wi Mannshoch. Das sind di beschte Vorussetzige, um sich in Irrgarte vom Maislabyrinth so richtig z verirre und daderbi no Spass z ha. Vili Lüt sind cho, um das Ereignis zmitts in de Sommerferie z erläbe. Zudem hets alles kha, was es für es zünftigs Eröffnigsfäscht bruuchd: De Maisbarwage, e Gumpiburg, en Degouschtationsstand vo de Wybaugnosseschaft und viles meh.

So sind d Initiante vom Maislabyrinth, di beide Buure Andi Benz und de Sandro Sozzi begeischtered gsi: Mega mega cool…super und d Erwartige sind klar übertroffe, so hend si sich gegenüber de Wettiger Nochrichte güssered.

Wer in de Ferie isch und s Maislabyrinth in de hüt und in de nächschte Täg nöd cha bsueche, di chönnd mir beruhige. Es isch mindescht bis Ändi September offe. Und für di wo umme sind: Hüt am Samschtig, 22. Juli 2017 isch bis um Achti am Abig no offe.

Advertisements