De Aalass het scho Tradition. De Künstler wo im Museum Eduard Spörri usstellt trifft uf de Kellermeischter vo de Wybaugnosseschaft.
Am Mittwoch, 13. September 2017 het s disjährig Träffe stattgfunde. De Kurator vom Museum, de Rudolf Velhagen het zämme mit de Künstlerin Ursula Rutishauser ihri Usstellig «Jeder Ort kann Zentrum sein» de Bsuecherinne und Bsuecher nöcher brochd. Danach het de Kellermeischter vo de Wybaugnosseschaft, de Meinrad Steimer zu ere Degustation vo Wettiger Wy iiglade. Zerscht hets en Blanc de Noir und en Pinot Gris geh, danach d Wettiger Spitzenusläs und en Barrique.

Für d Bsuecherinne und d Bsuecher isch d Kombination us Kunscht und Wykultur sehr inspiriirend gsi. D Usstellig vo de Ursula Rutishauser cha me no bis zum 10. Dezember jewils am Samschtig und Sunntig vom Zwoi am Namittag bis um Föifi ga luege.