Hüt isch d Budget-Debatte im Iiwohnerrat

Am Donnschtig, 19. Oktober 2017 entscheidet de Iiwohnerrat übers de Budgetvorschlag vom Gmeindrat fürs Jahr 2018. Aber au s Kreditbegehre für de Hochwasserschutz am Lugibach und d Konzesionsabgab für Erdgas dörft Diskussionsstoff biete.
D Fraktionsbricht, wo jewils im Vorfeld vo de Iiwohnerratssitzige veröffentlicht werde, chönnd eim Hiwiis geh, was in de jewilige Iiwohnerratssitzig z erwarte isch. Si zeiged, dass es hüt am Abig ab de Sibni im Rathusssaal spannend dürfd werde. Gliich ob di faktisch Stüürerhöchig um 3 %, d Aaträg vo de Finanzkommission (Fiko), s Projekt am Lugibach oder d Iiführig vo de Konzesionsabgaab fürs Erdgas: D Meinige zwüsche de Fraktione gönd teilwiis wir usenand.
S Budget wird bispilswiis vo de SVP abglehnt, während d CVP, d FDP und EVP/Forum 5430 Zuestimmig signalisiired. SP/WettiGrüen wot d Stüüre uf 100% erhöche, während de Michael Merkli (Fraktion FWW/BDP) uf Twitter schriibd, dass de Stüürfuess bi 92% set bliibe.
Bi de Renaturirig vom Lugibach und em plande talquerende Wäg sind d Fraktionsbricht vo de SVP und EVP/Forum 5430 so offe formuliirt, dass no nöd klar isch, wi si letschtlich stimme werde und d CVP wot de Verlust vo Kulturland minimiire. Zudem hend di betroffene Buure, wo sich au scho per Läserbrief güssered hend, geschter d Iiwohnerröt zu ere Begehig a de Lugibach iiglade, um über ihri Vorbehalt zum bestehende Projäkt z informiirt.
Es wird hüt am Abe uf jede Fall spannend werde.

Advertisements