Au das Johr wird mer a diverse Ort chönne go Christbäum chaufe.
Traditionell esch KAB uf em Rathuusplatz be de grosse Tanne z‘Treffe.
Det send Nordmanntanne, Blautanne und au die klassischi Rottanne im Aagebot.
Die Bäum chömmed all us de nöchere Region, send also ned med Lastwage, eng a eng zämebunde vo wittewegg uf Wettige brocht worde.
De Erlös vo dene verchaufte Bäum god je en Drittel ad Arwo, ad Mission Brücke – le Pont und ad KAB selber.
Göffnet vom 12.Dezember bis am 23.Dezember
Mändig bis Fritig 9.00-12.00Uhr, MittagsPause, 13.30-18.30Uhr
Samschtig 8.30-17.00Uhr
En wittere Christbaum-Verchauf wo be Gross und Chlii sehr gschätzt und gliebt wird, esch de von de Famile Benz uf em Ziegelhof a de Landstross 227.
De findet das Johr a Zwoine Täg statt. Am Samschtig 16. und Sonntig 17. Dezember.
Uf em Ziegelhof findet mer nebe de Christbäum au no e beheizti Festbeiz, feini Köstlichkeite vom Grill, e Wiehnachtszauber-Bar, e Hüpfburg, en Chlii-Tierzoo und es Ponyritte für d Chend….
Das ganze findet jewiils ab 14.00 Uhr bis ca. 16.30 Uhr statt.
Nebe dene zwoine Ort get’s natürlich au möglichkeite uf em Lüscherhof a de untere Geisswiesstross direkt ab Hoflade go Christbäum go chaufe oder a de Schartestross, nebem Pfarreiheim, au direkt vom Hof vo de Fam. Huser, be de Migros a de Landstross, bem Coop im Tägipark, uf em Zentrumsplatz, und und und…..
Uf jede Fall veel Vergnüge bem Ussueche vom schönste Christbaum =;O)
Wettiger Nochrichte 