A de Hochbrugg het bim Brückekopf Oscht e Medieorientiirig stattgfunde, wo d Zammenarbet zum Thema gha het. Konkret isch es um d Polizei gange.

D Regionalpolizei Wettige-Limmattal (Repol) und d Stadtpolizei Bade prüefed, in wellere Form di beide Polizeikorps chönnted zammeschaffe. Guet chlapped het das scho bi de Badefahrt, wo au d Repol im Iisatz isch gsi.

Wi s Badener Tagblatt brichted, het de Wettiger Gmeindamme Roland Kuster bim Medieaalass betont, dass beidi Korps di gliiche Ufgabe, di gliich Iisatzdoktrin und di gliich Usrüschtig dät verfüege und es so eigentlich logisch sig, dass me gmeinsam s Optimierungspotenzial würd genau überprüefe.

Im Vordergrund vo de Abklärige stoht d Sicherheit und nöd s Sparpotenzial, aber ineme Zämmeschluss chönnd scho en Effizienzsteigerig stecke.

Ob es zum Schluss zuere Fusion vo de Polizeikorps chunnd oder en anderi Art vo Zammenarbet useluegd, isch no offe.