S Badener Tagblatt brichtet hüt über d Antwort vom Gmeindrot uf en Interpellation vom Iiwohnerrot Michael Merkli vo de BDP. Er hed am 26. Juni 2014 gfröged, ob numme Müettere de Kurs “Dütsch für fremdsprochigi Müettere” dürfed bsueche oder au Vätere. De Gmeindrot het die Interpellation am 29. Januar 2015 beantworted und druf higwiese, dass s Interesse bi de Vätere nöd vorhande sig, me aber durchus en Abed-Kurs für sie chönnti aabüte, wenn s Interesse Vorhand sig.
In de Zitig wird de Vorwurf erhobe, de Gmeindrot heig en unehrlich Antwort geh, will zwei Vätere de Kurs hei welle bsueche, vo de Lehrerin aber siged abgwise worde.  Us eusere Sicht cha me em Gmeindrot zwar vorwerfe, er sig bi de Frog, ob Vätere es Interesse am Kurs heige gha, nöd ganz ehrlich gsi (oder nöd guet informiert), aber es isch in de Antwort uf d Interpellation klar vo eme Abed-Kurs d Red gsi, wo dann numme für Vätere (oder Manner?) wär gsi, wie s Badener Tagblatt au korrekt brichted. Vermuetlich handelt sichs letztlich um en “Sturm im Wasserglas”.