D Firma Obrist isch z Wettige nach wie vor en Begriff. Jede Mittwoch chömmed d Männer vom Obrist, wo für d Grünabfuhr zuständig sind. S Badener Tagblatt hed in de hütige Usgab es Interview publizierd und au scho im letzschte Johr uf e Spezialität vo dere Entsorgigsfirma higwisse. Wege dere Spezialität düend au mir hüt en Artikel über de Obrist publiziere: Me cha sich dete nämlich en Kindheitstraum erfülle oder mit eme Gschänkguetschi la erfülle und en ganze Tag mit der Güselabfuhr mitfahre. S in so eme Fall am Morge um 6.30 Uhr mit ere Sicherheitsinstruktion los, damit d Press, wo hinte am Fahrzüüg isch, sicher cha bedient werde und me weiss, we de Chauffeur bim Retourfahre iiwiise. Au uf de Vercher z achte isch wichtig. Je nach dem isch de Arbeitstag zwüsche 16.00 und 18.00 Uhr wider vorbi und je nach dem, wie fit me isch, het me am nächschte Tag in Form vo Muskelkater au no öppis dervo und interessanti Erfahrige bliibed eim no länger.
So en Guetschii chost 350 Franke und cha uf de Interneplattform geschenkidee.ch chauft werde. Das isch uf de ersti Blick nöd ganz billig, aber da derbi isch au d Usrüstig, mit Sicherheitsschueh, s Z’Mittag, en Ersatzmaa, falls me dann scho müed isch und zur Erinnerig es T-Shirt an de Tag mit de Güselabfuhr.
Wettiger Nochrichte 