Hinterem Parkplatz bi de Leueschüür stoht es Buurehuus, wo em Kanton ghört. Sit vilne Johr isch es unbewohnt und mir vo de Wettiger Nochrichte hei öis bim Kanton erkundiget, was mit dem Huus in Zuekunft wird passiere.
De Kantonsbaumeister, de Wettiger François Chappuis, het öis uf öiseri Froge usführlich Antwort geh. S Huus ghöri zu de “iserne Reserve” vom Kanton uf de Chloschterhalbinsle, so dass en Verchauf usgschlosse sig. Wäge eme Wasserschade vor öppe zwei Johr chas s Huus zur Ziit numme als Lager bruuchd werde, so de Chappuis. De Regiirigsrot het im Rahme vo de Masterplanig und de Schulruumentwicklig Nutzigsoptione für d Gebäud und d Prioritäte feschtglegt. Bevor für s Gebäud a de Chloschterstroos 20 öppis entschiide wird, gohts noch e paar Johr, wil z erscht d Drüfachturnhalle realisiirt wird, dann d Umnutzig vo de alte Gymnastikhalle im Weschtflügel aastoht und au en Ergänzigsbau z prüefe isch. Erst danach, so de François Chappuis, wird d Entwicklig vo de Chloschterstroos 20 zur Disposition stoh.
S Warte uf besseri Ziite goht also noch es zitli.
Wettiger Nochrichte 