Am 22. Novämber isch es so wit: Es isch de 2. Wahlgang vo de Ständerotswahl und z Wettige isch s Stimmvolk ufgruefe, über s Budget für 2016 abzstimme.
Für d Wahle, wo entscheide, wer mit de Pascale Bruderer öisern Kanton im Ständerot wird verträte, stönd vier Lüt zur Wahl: De Hansjörg Knecht (SVP), de Philipp Müller (FDP), d Ruth Humbel (CVP) und de Pius Lischer, wo ehnder als Exot aatritt. Wil vili vo de Parteie, wo links vo de CVP positioniirt sind, d Ruth Himbel empfehle, isch s Renne offe und d Kandidate sind, so wir mir das mitübercho hei, sehr nervös.
Für öis z Wettige isch aber au d Abstimmig wichtig, wo am Sunntig entschide wird. S Budget, wo de Iiwohnerrot im Oktoner bschlosse het, muess vo de Stimmbürger aagnoh werde. Wil d SVP eigetlech meh het welle spare und di linke Parteie e Stüürerhöchig hei welle, wär es theoretisch möglich, dass e “unheiligi Allianz” s Budget duet ablehne.
Aber wi au immer ihr bi de Wahl und de Abstimmig däted entscheide. Öser Tipp: Stimmzettel usfülle und ins Rothuus bringe!
Wettiger Nochrichte 