Mir hei scho vo de Motion vom Alain Burger (SP) zu ere Fusion vo Bade, Wettige und allfällige andre Gmeinde zu ere Regionalstadt brichtet. Jetzt hei d Fraktione im Vorfeld vo de Sitzig vo morn in ihre Fraktionsbricht Stellig zu allfällige Fusionsplän geh. Abgseh vo de Fraktion SP/WettiGrüen, wo sich für es Überdenke vo de hütige Strukture usspricht, lehne alli Parteie e Fusionsdiskussion – zumindescht im Momänt – ab, wenn au us unterschiidliche Gründ.
Mir versueche d Standpünkt vo de Fraktione kurz zämmezfasse:
CVP: D CVP-Fraktion meint, dass e Fusion zum Zämmeschaffe nöd zwingend sig. D Verbundufgabe wi bi zum Bischpil bi de Regionalpolizei und em Zivilschutz siged es Erfolgsmodell. D Zöemmenarbet brinig en Mehrwert bi gliiche oder günschtigere Choschte. Ohni Fusion chönni Wettige sini eigedi Identität vollumfänglich bhalte und s Mitspracherecht vo de Bevölkerig würde nod beschnitte. Wettige sölli nöd zum Vorort vo
SVP: D SVP-Fraktion isch eistimmig gäge d Motion und unterstützt de Wäg vom Gmeindrot, durch Kooperatione Synergie z nutze und dadurch Choschte z senke und s Aagebot z opitmiire, ohni di demokratisch Mitbestimmig und di eige Identität z gfährde.
SP/WettiGrüen: D Fraktion erwartet e spannedi Diskussion zum Thema und betont, dass d Argument vom Gmeindrot, zur Ablehnig vo de Motion, nöd däte überzüge. D Region mit de Gmeinde Wettige, Bade, Noiehof und Ännetpade sig en gmeinsame Läbesruum, wo vili Probläm numme gmeinsam chönni löse. Bi de bestehnde Strukture siged setigi Lösige aber numme mit Verträg zwische de Gmeinde möglich, wo langfrischtig binde und letztendlich es Demokratiedefizit bewürke. Bi ere Fusion zu ere Regionalstadt chönnti d Bevölkerig dann jewils aber das abstimme, wo si au betrifft.
FDP: Für d FDP-Fraktion isch en Zämmeschluss vo Bad eund Wettige zu ere Regionalstadt nöd mehrheitsfähig. Politische Druck vo obe sig daderbi aber kei Lösig, sondern de Wunsch nach ere Fusion müssi vo de Bevölkerig her wachse. D Lösig gseht Fraktion nach wi vor in ere Intensiviirig vo de regionale Zämmenarbet.
EVP/Forum5430: D Fraktion isch der Meinig, dass d Ziit für e Diskussion über e Regionalstadt no nöd riif sig. Si gseht d Abstimmigsergebnis in de Nochbergmeinde als es kalres Indiz dadefür.
GLP: D GLP-Fraktion finded, dass en Zämmeschluss vo Bade und Wettige numme sinnvoll sig, wenn dadurch Koschte und au de Stüürfuess erheblich chönnt gsenkt werde.
De Fraktionsbricht vo de BDP isch uf de Site vo de Gemind Wettige zum Zitpunkt, wo mir den Artikel verfasst hei, no nöd veröffentlicht worde.
Wettiger Nochrichte 