D Astrid Berz isch nordamerikanischi Meischterin worde

D Wettigeri Astrid Berz het d nordamerikanisch Meischterschaft im Kite Foil Course Racing gwunne.

Astrid Berz KitesurferWo d Astrid Berz im 2001 zum erschte Mol en Kitesurfer gseh het, da het si no nöd chönne wüsse, wi genau s Kitesurfe ihres Läbe wird verändere, aber si het sofort gwüsst: «Das wird mini Zuekunft si.»
Beharrlich het si dann a dere Zuekunft gschaffed. Im 2006 het si en Ausbildig zur Kite- Instruktorin absolviirt und im 2009 ihrs Läbe komplett umkrempled, indem si mit ihre Fründin z Italie e Kitesurfschuel gründed het. Nebe vilne andere Titel isch der vo 2014 z Calgliari einer vo de wichtigschte gsi. Sie het bi de «World Championship Formula Race Master» de erschti Platz belegd.
Ihri inzwische scho sehr beachtliche Lischte vo Erfolg het si im Januar en witere wichtige chönne hinzufüege. Si het z Süd-Kalifornie, also z Mexiko, di nordamerikanisch Meischterschaft im Kitefoil Course Racing gwunne. Damit het si s Ziil erreicht, wo si sich persönlich für den Wettkampf gsetzt het gha. De gsamti Wettkampf, wo vom 17. bis zum 23. Januar 2016 stattgfunde het, het nämlich viir Diszipline umfasst. Für jedi vo dene Diszipline hets en Einzelwertig geh und vo allne zämme e Gsamtwertig. S Ziil vo de Astrid Berz isch vo Aafang a de Siig bi de Einzeldisziplin  Kitefoil Course Racing gsi. Us dem Grund isch si au numme in drü Diszipline aaträte, um Chraft z spare. Gliichwohl isch es ihr mit numme drü Diszipline glunge, im Overallklassement zum «Lord of the Wind» de dritii Platz z erreiche.
Mir vo de Wettiger Nochrichte gratuliired de Astrid Berz ganz herzlich zu ihrem Erfolg!

Advertisements