Sind eispurigi Iisebahnstrecke gfährlich?

S Bahnunglück vo Bad Aibling, für das laut Mediebricht de Fahrdienschtleiter verantwortlich gmacht wird, wirft au d Frog uf, wi es um d Sicherheit in de Schwiiz bstellt isch.

2012-10-21 17.13.07De Zämmestoss vo zwei Züg z Bad Aibling het am Tsischtig letzschti Wuche 11 Todesopfer gfordered. Uf ere eispurige Strecki sind zwei Züg frontal zämmegstosse. Wiso es technisch möglich isch, dass en Fahrdeinschtleiter en Zug in en Gleisabschnitt laht innefahre, wo bereits durch en entgegekommende Zug befahre wird, isch ois es Rätsel.
Wil vili Wettiger täglich mit de S6 Richitg Würelos uf ere eispurige Strecki unterwägs sind, hei mir bi de SBB aagfröged, ob so en Uufall au bi ois möglich sig oder ob di technische Vorussetzige anderscht siged. D SBB het ois aber mitteild, dass si zu eme Uufall im Usland, zu dem zudem d Untersuechige däte laufe, grundsätlich nöd Stellig düent neh. D Sprecher het aber betond, dass alli Sicherheitsvorschrifte, wos Bundesamt für Vercher vorschriibt, däte iighalte werde. Uf d Frog, was den vorgschribe sig, het er ois ans Bundesamt vür Vercher (BAV) verwiise.
S BAV wiist in sinere Antwort druf hi, dass Zugfahrte durch technischi Syschtem gstüüret und gsicheret werde, unabhängig dadervo, ob en Zug Verspötig het oder nöd. De Iisatz vo de Zugbeiiflussig isch in de Schwiiz hoheitlich vorgschribe und muess nach de Regle vom BAV so iigsetzt werde, dass Risike, wo durch en Fähler vom Lokiführer chöi passiire, uf es akzeptabls Mass z begrenze sind. Bi ere technische Störig isch es im Fahrdienschtleiter erlaubt, eme Lokiführer e Fahrt unter Umgehig vo de technische Syschtem z ertlaube, wenn das zur Ufrechterhaltig vom Bahnbetriib notwendig isch. Aber dann gälted sehr reschtriktivi Bedingige, wi e protokollpflichtigi Kommunikation zwüsche Fahrdienschtleiter und Lokiführer und e Reduktion vo de Maximalgschwindigkeit. S BAV isch überzoge, dass de Iisebahnvercher ufgrund vo dene Vorschrifte sehr sicher isch.
Was di konkreti technisch Usstattig vo de Strecki zwüsche Würelos und Wettige betrifft, hets BAV kei Aagabe chönne mache und an de Streckbetriiber, also d SBB verwise.

Advertisements