De Abstimmigssunntig isch vorbi – d Wettiger Ergäbnis liged im nationale Trend

2016-02-28 18.02.24.jpgDe ei oder ander wird froh si, dass de Abstimmigssunntig endlich vorbi isch. Denn jetzt cha me in de soziale Medie, wi z. B. uf Facebook wider Katzevideos und settigs gseh und wird nöd von ere Lawine an Polit-Posts überschwemmt.
Di politische Debatte, insbsondere pro & contra Durchsetzigsinitiative, aber au über di zweit Gotthardröhre, d Abschaffig vo de Hüürotsstrof, s Verbot vo Nahrigsmittelspekulatione und im Aargau über d Ufheibig vo de frühe Sperrstund an de füf höchschte chrischtliche Fiirtige isch vorbi. Wobi me cha säge, dass alli Abstimmige im Schatte vo de Diskussione über d Durchsetzigsinitiative gstande hei.

Z Wettige hei im Schnitt öppe 2/3 vo de Stimmberechtigte ihri Stimm abgeh und bi de einzelne Vorlage so entschiide, wi d Schwiiz als ganzes. Hiir d Ergäbnis im Einzelne:
– D CVP-Initiative vom 5. November 2012 «Für Ehe und Familie – gäge d Hüürotsstrof» isch z Wettige mit 4034 Ja und 4086 Nei knapp abglehnt worde. S Ergäbnis im Bund isch s gliiche gsi und au zimlich knapp.
– D SVP-Initiative vom 28. Dezember 2012 «Zu de Durchsetzig vo de Usschaffig vo kriminelle Usländer» hei mir mit 2861 Ja zu 5444 dütlich abglehnt und au im Bund isch d Initaitive mit öppe 60% bachab gschickt worde.
– D Juso-Initiative vom 24. März 2014 «Kei Spekulation mit Nahrigsmittel» isch z Wettige mit 3144 Ja gege 4871 Nei dütlich abglehnt worde, wi au uf Bundesebeni. In zwei Kantön und zwar z Basel-Stadt und im Jura het die Initiative e Mehrheit gfunde gha.
– D Änderig vom 26. September 2014 im Bundesgsetz über de Stroosetransitvercher im Alpegebiet (2. Gotthardröhre) isch z Wettige, wi au im Bund aagnoh worde und zwar mit 5285 Ja zu 2930 Nei.

Au di einzig kantonal Vorlag , d Initive vo de Piratepartei «Weg mit em Tanzverbot» vom 10. Oktober 2014 isch vo de Wettiger Stimmbürgerinne und Stimmbürger mit 3709 Ja zu 4076 Nei abglehnt worde, wi das au im Kanton de Fall isch gis.

Advertisements