De Alti Waldpartiiwäg wird ab em 4. April gsperrt

Scho bi de Iiwohnerrotssitzig im Januar 2016 isch de Kredit für d Saniirig vom Alte Waldpartiiwäg gschproche worde. Aafang April fanged jetzt d Bauarbeite aa, so dass de Wäg bis öppe Aafang Juni gsperrt wird si.

2012-11-01 16.13.26.jpg

De Alti Waldpartiiwäg

ViIli Wettiger wüssed vermuetlich nöd weller de Alti Waldpartiiwäg isch, obwohl er hüüfig und gärn bruucht wird, sigs für e Wanderig zu de Walhalla, uf de Lägeregrat oder zum Buesberg. Er führt nämlich vo de Mooshaldestroos zum Parkplatz im Wald und wer vo dete zu ere Wanderig started, cha sich di erschte Höhemeter vom Dorf uffe spare.
Will jetzt aber en Entwässerigsleitig iibaut und de Stroosebelag ernoieret werde muess, wird Stroos für de motorisiirt Verkehr gsperrt. Numme de Langsamverkehr wird während de Bauziit de Wäg zum Wald chönne bruuche. Bis Mitti Mai werdet sogar d Aawohner vo de Mooshaldestroos, als zum Bischspiel im Fährli-Lee und em Grafeguet, und d Rebbuure de Wäg vo de Rebbergstroos her müesse bruuche. Danach wird zumindescht d Chrüzig Mooshaldestroos/Alte Waldpartiiwäg wider passierbar si, so dass d Zuefahrt zum Grafeguet wider offe wird si.

 

Advertisements