Wi mir jetzt erscht erfahre hei, isch es bi de Demonstration vo Tiirschützer gege d Tiirhaltig vom Circus Royal am letschte Wocheend zu ere Eskalation cho. Daderbi het d Polizei schints en Demonschtrant in Handschelle glegt.
Mitgliider vo de Schwiizer Liga gege Vivisektion und für d Rächt vom Tier (LSCV) begleited de Circus Royal bi sinere Tournee mit Demonschtratione. Dadermit wot de LSCV uf s Liide ufmerksam mache, wo d Tiir nach de Meinig vo de Liga erliided. Z Wettige hei si au e Gnehmigung für e Demonschtration gha, aber d Uflag, Flyer numme uf de gegeüberligende Siite vo de Stroos z verteile. De Grund für d Iischränkig isch d Angscht gsi, dass Circusbsuecher uf d Stroos chönnte grate, wenn d Demonschtrante direkt vor em Circus däte Flyer verteile. Wo sich en Demonschtrant nöd an d Uflag ghalte het und direkt vor em Iigang Flyer verteilt het, isch er vo de Regionalpolizei in Handschelle glegt und abgführt worde. D Benjamin Frei vo de LSCV hält d Polizeiaktion für e massivi Iischränkig vonde Meinigfreiheit, während de Gmeindsammaa Markus Dieth nach Aagabe vom Badener Tagblatt vo eme verhältnissmässig Vorgoh vo de Polizei red.
Wettiger Nochrichte 