Nachdem d Rechnig 2014 mit eme Fehlbetrag vo 5.7 Mio. Franke abgschlosse het, gsehts Rechnigsjohr 2015 vil besser uns.
In ere Mediemitteilig het d Iiwohnergmeind drüber informiirt, dass d Johresrechnig 2015 bi eme Umsatz vo 107.3 Mio. Franke mit eme Ertragsüberschuss vo 3.6 Mio. Franke vil besser abschlüsst, wi es erwartet worde isch. Das isch au insofern überraschend, als d Gmeind mit ere witere Verschlechterig vom Stüürertrag vo öppe 5 Mio. Franke het müesse rechne, wo durch Iisparige und Ertragsverbesserige het sölle kompensiirt werde.
Dass das Ergäbnis het chönne z Schtand cho, isch – so de Gemindsamaa markus Dieth – uf es frühzitigs und intensivs Finanzcontrolling uf allne Ebene zruckzführe und ere grosse Finanzdisziplin in de ganze Verwaltig. So sind bim Personal öppe 570’000 Franke iigspart worde und bim Sachufwand sogar 2.6 Mio. Franke. Dadergäge sind d Fiskalerträg sogar noch tüüfer gsi wi budgetiirt und au d Entgelt vo de Sozialhilferückerstattige sind tüfer gläge wi budgetiirt.
Will sit em 2012 d Scheri zwüschem budgetiirte und em tatsächliche Stüürertrag immer witer usenand sind, het es im 2014 das Loch in de Kasse geh, wo durch d Sparmassnahme im 2015 hei chönne kompensiirt werde. Für 2016 goht d Gmeind dervo us, dass di budgetiirte Iinahme dülich nöcher an de reele Zahle werde lige.
Wettiger Nochrichte 