S 4. Vespa-Oschterträffe am Karsamschtig isch en volle Erfolg gsi. Me wi 100 Vespas mit Fahrerinne und Fahrer hei sich uf em Rothuusplatz z Wettige iigfunde. D Organisatore vom Aalass, de Vespa Club Wettige, hend entschide gha, de Aalass us Platzgründ vom Zentrumsplatz daher z verläge.
Bi strahlendem Früehligswetter sind ab Vespas us de ganze Schwiiz und au us em aagränzende Usland zum Saisonstart uf Wettige cho. De Aalass, wo scho Tradition het und vor drü Johr vom Uwe Knopf erfunde worde isch, het no nie so vili Vespa-Fründe aazoge, es het aber au no ni so schöns Wetter gha. Nebe de Vespa-Fründe sind au vili Lüt cho – unter ihne de Wettiger Gmeindsamaa Markus Dieth-, wo eifach di schöne Vespas hei welle aaluege, e Grillwurscht ässe und öppis trinke.
Begrüesst het de Präsident vom Vespa Club Wettige, de Thomas Zimmermann, um kurz ab de eis und de Wettiger reformiirt Pfarrer, de Lutz Fischer-Lamprecht, het di aawesende Fahrerinne und Fahrer gsägnet und ihne e unfallfreii Saison gwünscht.
Danach hets en Corso geh, es Usfährtli, bi dem fascht alli Vespas mit unterwägs si gsi und danach isch es mit «Benzingschpröch» gmüetlich witergange, bis gege Abe au di letschte hei gfahre sind.
Wettiger Nochrichte 