Winkelriedstroos bim Alteburg wider offe

D Winkelriedstroos isch uf de Höchi vom Schuelhuus Alteburg und witer Richtig Zentralstroos sit einige Mönet gsperrt gsi. Jetzt isch so wider offe, au wenn noch mit kurzfrischtige Sperrige z rächne isch.
Nach de Saniirig vo de Werksleitige, hei d Bauarbeiter in de letzschte Ziit d Bsetzischtei für d Abgränzig vo de Trottoir iibaut und geschter, am 6. April sind d Trottoir hinter em Schuelhuus Alteburg asphaltiirt worde. Hüt isch dann di erschti Schicht vom Stroosebelag iibaut worde. In de Zwischeziit sind d Verbotsschild ewäg und d Auto hei hüt am Abe d Stroos chönne bruuche. Will no e zweiti Asphaltschicht uf de Stroos und de Trottoir muess iibaut werde, chunnts sicher no einisch zu erre Sperrig, aber dann hei d Fuesgänger, d Velo- und Autofahrer und alli andere Verchersteilnehmer wider freii Bahn. D Fahrbahn isch aber, wi es au bi de andre Noibauprojäkt im Quartiir de Fall isch, schmäler wi vorher und für d Fuessgänger hets dütlich meh Platz, was d 30er-Zone für de Langsamverkehr sicherer macht.