Als Turischt Wettige aaluege – öppe 30 Persone sind mitcho zum erste Architekturspaziergang dur Wettige. De Herr Schoop het vom Bahnhof bis zur Chile Sankt Sebastian gfüert.
Teil Lüüt sind a Orte cho, wo si no nie gseh händ – im eigene Dorf!
Was cha mer alles gseh anere Fassade? – s Material: Bachstei, Beton, Rigel, Verputz, Natursteiplatte. S Relief: Was isch wiiter vorne, was isch wiiter hinde, und wie sind d Abständ zwische de Element? Isch d Horizontale betont oder d Vertikale useghobe? Und wie wirkt das alles ufs Aug? Spannend isch das zgseh a Hüser, wo me meint, mer kenni si scho lang.
Vili Baustiil sind zitiert a de Sebastians-Chile: Romanik, Gotik, Burgebou, es irisches Chrüüz. De Corbusier het s’Zäntrum mit de Hochhüser beiiflusst, es Huus in Manhattan isch Muster gsi für en Bou a de Zwyssigstross. D’Architekte wo z’Wettige gwirkt händ, Herre wie de Karl Moser, Hans Näf, Otto Hirt, Ami Conrad, Theo Hotz sind offe gsi für di neue Idee vo ihrer Zyt und händ doch öppis Eigständigs für Wettige gmacht. Söttigi Zämehäng het de Herr Schoop zeigt. Mir wüssed öppis meh – und gsänd jetz öppis meh und chönned voller Stolz dur Wettige laufe, au mit Bsuech vo usswärts. (MLR)
En zweite Spaziergang zum selbe Thema findet am Samschtig, 21. Mai statt:
Start 15 Uhr a de Ecke Seminarstrass/Nägelistrass (Nähi Bushalt Schwimmbad Bade), Schluss 17 Uhr bim Schartenfels mit Apéro.
Kostebitrag Fr. 10.00. Aameldig erwünscht: 056 426 99 03 oder reinert(at)bluewin.ch
Auf Ihr Interesse freut sich: Marie Louise Reinert
Wettiger Nochrichte 