Am Donnschtig, 19. Mai 2016 isch di dritt Sitzig vom Iiwohnerrot i dem Johr und uf de Traktandelischte stöhnd füf Poschtulat und ei Kreditabrechnig.
Bi de Kreditabrechnig, wo de Iiwohnerrot am Donschtig söll gnehmige, gohts um d Ufstockig vo drü Schuelhüüser und Aapassige in de Schuelaalag im Margeläcker. D Rechnig schliesst mit Fr. 828‘046.90 bzw. 5.1 % weniger wi ursprünglich budgetiirt. D Finanzkommission (Fiko) beführwortet d Gnehmigung eistimmig, so dass kaum Diskussione z erwarte sind. Anderscht gsehts bi de füf Poschtulat us.
Zwei wot de Gmeindrot entgegeneh und zwar das vom Leo Scherrer (WettiGrüen), wo d Strahlebelaschtig wot abklärt ha, falls sich im Kernkraftwerk z Beznau en GAU dät ereigne und das vo de Fraktion CVP und de Marie Louise Reinert (EVP) iigreichte zu de Zuekunft vo de Blasmusik z Wettige. Au s Poschtulat vom Andreas Benz zu de Planigssicherheit für d Wettiger Verei in Bezug uf d Sportplätz wird entgegegnoh, aber glichzitig als erlediged abgschribe. S Poschtulat vo de Fraktion SP/WettiGrüen zu ere gschtafflete Schulruumplanig im Hiblick uf d Nutzig vom Gluri Suter Huus wot de Gmeindrot ablehne. D Fraktion isch gschpannt uf d Begründig vom Gmeindrot zur Ablehnig, wi si in ihrem Fraktionsbricht schriibed.
Uf jede Fall Diskussione wird’s zum Poschtulat vo de FDP geh, wo wot, dass bi Vorstöss jewils d Koschte, wo en Vorstoss verursached, ufzeigd werde. Lut Traktandelischte wot de Gmeindrot das Poschtulat mit eme Bricht beantworte und es dann abschriibe. Us em Aatrag vo de Gschäftsprüfigskommission (GPK) wird dütlich, dass de Bricht vom Gmeindrot uf en Erhebig vo de Choschte wot verzichte. D GPK het das eistimmig bschlosse, aber d Fraktion wot am Poschtulat feschthalte, so dass es in de Sitzig am Donnschtig zu ere Diskussion und ere Abstimmig wird cho.
Wettiger Nochrichte 