De Zentrumsplatz isch am 28. Mai2016 e riisige Wältbühni gsi. Nöd nur s Wätterglück isch de 500 Gäscht us aller Wält ufs Gsicht gschribe gsi. Kläng und Tänz, aber au Ässe us verschidenschte Länder händ d Wettigerinne und Wettiger auber au vili Lüüt us de Region e Wältreis uf bsunderi Art ermöglecht. Näbem Getränkeschtand vom Verein Fest der Kulturen, wo vo engagierte Flüchtling us Wettige und de Region betribe worde isch, häsch chöne Äthiopischem Kafi, Cevapcici, Ghanaischi Köschtlechkeite, Tamilische und Kreolischi Pouletkreatione aber au Indischischi und Thailändischi Schärfi vergliiche. Du häsch aber au chönne zueluege wie d Kurdinne ehres Fladebrot härezauberet – richtigi Erläbnisgaschtronomie nennt mer das. Speziell z Erwähne sind aber au d Jungs vom Verein Bio für Jede – sie händ euses Agebot mit Vegane Multikulti Wraps abgrundet. So öppis hetts no nie gäh.
Au bim Programm hätts eis Highlight nachem andere gäh – Im Willi Haueschtei sini Afropercussionsgruppe hätt eusi Ghanaischi Chöchin uf de Platz grüeft, d Kud Kolo Chind händ eus uf Serbie empfüehrt und die Kurdische Meitli händ eus sogar a de Hand gnoh und mittanze loh. S’ 15 Chöpfige Orcheschter Ilsah (ilsah.ch) hätt eus met ehrere wuderbare Wältmusig verfüehrt. Ps. Wär aber “Café au lait” Tanz, Trummle und Sing Kompanie verpasst hätt, isch sälber schuld – die sind de helli wahnsinn gsi! Zu eusere Überraschig isch spontan no d Alphorngruppe Reussblick cho en Schlussgruess überbringe. Ich be jetzt no ganz verzauberet. (LS)
Wettiger Nochrichte 