D Predigt vo de Kafi Freitag isch es Erläbnis gsi

Di reformiirt Chile z Wettige isch am Sunntig, 29. Mai 2016 guet gfüllt gsi. E bunti Mischig us Chilegmeindmitglider und interessiirte us Nah und Färn sind uf Wettige cho um de Gottesdienscht vo de Kafi Freitag, em Lutz Fischer-Lamprecht und em Stefano Bertoni z erläbe.

2016-05-29 12.56.58Mit de Schlagzile «Kafi Lutz» in de reformiirte Chile hend mir am 19. Mai uf de Gottesdienscht ufmerksam gmached, wo geschter stattgfunde het. D Chile isch guet gfüllt gsi, mit eme sehr gmischte Publikum. Regelmässigi Chilegänger, setigi, wo no nie in ere reformiirte Chile sind gsi, Lüt wo sit über zäh Johr kein Gottesdienscht meh bsuecht hend, Lüt vo Wettige und Noiehof und setige, wo vo Züri oder Basel a dem Sunntig am Morge extra uf Wettige cho sind.
Si hend mitenand en Gottesdienscht gfiired, wo uf de eine Site en ganz normlaer Sunntigsgottesdienscht gsi isch, mit Lieder, Gebet und Bibelwort, uf de andere Site ganz anderscht, will d Gaschtpredigerin Kafi Freitag gsi isch, e Kolumnischtin vo de refomiirte Zitschrift «bref», wo sich als Atheischtin bezeichnet.
In ihre Predigt het d Kafi Freitag vil persönlichs prisgäh und ihre isch am wichtigschte gsi, dass e Grundvorussetzig für d Erfüllig vom biblisch Gebot «Liebe deinen Nächsten wie dich selbst» d Selbschtliebi isch. D Gottesdienschtbsuecherinne und -bsuecher het d Predigt so berührt, dass es danach spontane Applaus geh het.
Di guet, liebivoll Stimmig vom Gottesdienscht hend d Lüt dann mit ins Chilegmeindshuus gno, wo es noch vili aagrägti und au tiifsinnigi Gschpröch gäh het.

Mir hend mit de Kafi Freitag au es Interview gführt. Das isch hiir z finde: https://wettiger-nochrichte.net/2016/05/30/kafi-freitag-es-het-mich-sehr-beruehrt/

Advertisements