Scho im April hend mir brichted, dass d Bloggerin und Kolumnischtin Kafi Freitag uf Wettige chunnt. De Wettiger Pfarrer Lutz Fsischer-Lamprecht het si als Gaschtpredigerin iiglade.
Am 29. Mai isch es so wit: Der bsunderi Gottesdienscht fangt um halbizähni in de reformiirte Chile a de Etzelstroos aa. Wi mir über Facebook erfahre hend, isch d Kafi Freitag hüt, Donnschtig, 19. Mai 2016 scho z Wettige gsi, um d Chile kennezlehre und mit em Lutz Fischer-Lamprecht de Ablauf z bespräche.
S Thema, über das d Kafi Freitag wird rede, isch «Nächschteliebi» und de Pfarrer wird s Glichnis vom «Barmherzige Samariter» läse, wo in de Bible als Paradetekscht für s chrischtlich Gebot vo de Nächschteliebi gilt.
Mir vo de Wettiger Nochrichte werded bi dem Gottesdienscht derbi si und oich hinterher brichte, aber selbstverständlich sind «alli Interessiirte härzlich iiglade», wi de Pfarrer Fischer du Aafrog vo ois betond het.
Wettiger Nochrichte 